CLUB DE LECTURA COMPARTIDA

Quen non desexaría ser invisible algunha vez? Hoxe tivemos un club de lectura moi importante entre familias, profes e alumnado para tratar un tema necesario nos nosos días: o acoso escolar, da man de Eloy Moreno e o seu libro Invisible. Unha historia emotiva, conmovedora, diferente...Contada a través dos ollos dun neno; unha historia que podería ser a de calquera. Descubrimos que hai marcas que non sempre son visibles... Moitas grazas pola acollida! Foi moi enriquecedor coñecer as opinións e puntos de vista de todas as persoas.

CLUB DE LECTURA 3º

Hoxe tivemos a visita dunha inventora moi especial! Volve a Señorita Bubble da man de Ledicia Costas; esta vez para salvar Londres dunha invasión de ratas que roubaron unha peza moi valiosa para a raíña Isabel II. Será quen de recuperala e restaurar a paz no Reino Unido? As nenas e nenos de 3º de primaria teñen moi claro cal sería a solución para acabar co malvado Jack White e a súa tropa de roedores! Ademais, fixeron uns traballos moi chulos relacionados co libro, que lles gustou moitísimo.

 

CLUB DE LECTURA 6º

Hoxe as nenas e nenos de 6º de educación primaria emprenderon unha viaxe no tempo, nada máis e nada menos que ao Vigo do 1884, da man de Jules Verne, descubrindo a vida e os segredos das mulleres planta; unha homenaxe ás novelas de aventuras cargada de maxia, onde todo é posible. Ler á nosa escritora local Ledicia Costas sempre dá moito xogo nos clubs de lectura! Moitas perspectivas, puntos de vista e anotacións documentadas que axudan a saber máis da época viguesa e da súa historia.

Ademais, apareceron dúbidas e preguntas moi interesantes...

SEMANA DO LIBRO

 Así celebramos a Semana do Libro no Otero Pedrayo!!

CLUB DE LECTURA 2º (BANDA DESEÑADA)

Hoxe houbo unha novidade no club de lectura! Algunhas nenas e nenos de 2º escolleron un libro de banda deseñada! Con "Lendas do recreo" 2 - Campións do mundo, achegáronse a unha maneira diferente de ler da man de El Hematocrítico e estaban moi entusiasmad@s ca temática: os xogo das agachadas. Un libro divertido e cheo de situacións graciosas que engancharon desde o primeiro momento. Escolleron cal sería o seu récord do mundo e algúns eran ben simpáticos!

 

CLUB DE LECTURA 2º

Hoxe algunhas nenas e nenos xogaron ás adiviñas con Agustín Fernández Paz e o seu libro: Un tren cargado de misterios. Falaron dos seus soños e viaxaron con Ana por todos os países do mundo nese tren tan especial, no que ademais resolverán o misterio que encerran sete enigmáticas caixas azuis! Un club de lectura cargado de intriga, fantasía e xogos de palabras.

E UN DÍA DESCUBRIMOS...

 Estas cousas son as que nos dan as enerxías para seguir traballando na Biblio...

Un neno e unha nena que crean o seu propio club de lectura, len os libros nos momentos de ocio e os comentan. Foi unha proposta que xurdiu libremente deles...