Onte estreamos un novo torneo moi demandado entre o alumnado: Torneo de damas. Coma sempre, todo un exemplo de compañeirismo e amizade que se reflexou nas partidas, cunha concentración e silencio exemplares. Foi un torneo moi rápido que durou só un día, pero aproveitaron ao máximo esa hora do recreo para compartir este xogo de damas e aprender novas xogadas e movementos. Seguro que o repetimos o curso que vén! Noraboa ao gañador!
O martes 9 de xuño tivemos o noso querido Club de lectura compartida coas familias e foi todo un éxito! Ademais de ter moita asistencia, merendamos algunhas cousiñas que nos trouxeron algunhas mamás e falamos un montón sobre o libro e sobre as nosas experiencias lendo este libro tan divertido: Una catastrófica visita al zoo de Joël Dicker. Quedamos encantadas da gran acollida e do que está crecendo esta familia lectora. Por máis lecturas en familia e por máis recomendacións igual de interesantes ca esta, que nos permitiu falar de diversidade, liberdade e democracia, entre outras cousas, valorando os puntos de vista adulta e infantil. Ata o próximo!
Para rematar a saga de Lightfall neste curso, o mércores 10 de xuño fixemos o último club de lectura co libro 4: Un lugar entre dos mundos. Ademais de comentar os últimos acontecementos deste cómic tan chulo, fixemos un pequeno obradoiro de escritura creativa co alfabeto de Pellydir que aparece no libro e co que falan algúns personaxes. Tivemos que descifrar unha mensaxe secreta e escribir unha mensaxe para unha persoa do club. Foi un bonito recordo para levar deste club tan especial que nos deixou con ganas de saber o final da saga. Chegará o curso que vén? Estamos desexando saber o final!
O día 2 de xuño tivemos unha sesión dobre moi especial ca clase de 5 anos de infantil. Pola mañá, fixemos un club de lectura de iniciación, arredor do libro El club de lectura del conejito, que nos axudou a introducir o concepto do club de lectura e o funcionamento do mesmo nas nenas e nenos de 5 anos, enfocado ao cambio de etapa a primaria. Nel contaron cousas dos libros escollidos que leron na casa, aprendendo as quendas e a escoitar as opinións. Pola tarde, repetimos coas familias, para poder compartir con elas todo o aprendido e tamén facer recomendacións lectoras e amosar a biblioteca. Foi moi bonito compartir lecturas!
Hoxe tivemos o primeiro club de lectura ca clase de 2º de primaria, onde lemos e falamos do libro "Bo camiño, Valentiño", onde o protagonista viaxa facendo o camiño de Santiago e vai atopando aos seus amigos e amigas que o van cargando de cousas na súa mochila. Ademais de dar as nosas opinións acerca do libro e das personaxes favoritas, algunhas moi graciosas, tamén atopamos outros libros da mesma autora, Gràcia Iglesias, onde aparecen os mesmos personaxes que se van atopando con outras aventuras nas súas vidas.
