17 de junio de 2024

RECOMENDACIÓNS LECTORAS VERÁN

Aquí deixamos algunhas recomendacións lectoras e de xogos para este verán!

Animádevos a crear o voso recuncho lector e a soñar coas lecturas!

Bo verán e boas lecturas! 




11 de junio de 2024

CLUB DE LECTURA 1º

Hoxe tivemos o derradeiro club de lectura do curso ca aula de 1º, co libro Feliz feroz, o lobo riquiño do Hematocrítico. A irmá de Lobo Feroz está moi preocupada porque o seu fillo non é feroz: é boísimo. Feroz dille que o mande uns días para a súa casa, que xa se encarga el de convertelo nun lobo de verdade. Lobiño visita o seu tío e tenta facer o que lle pide: cazar coellos, asustar a Carapuchiña, comer os tres porquiños... Pero nunca o fai ben: comparte unha ensalada cos coellos, faise amigo de Carapuchiña e ponse a xogar cos tres porquiños. Este lobiño é un desastre.

Porque temos que ser o que queiramos ser!

Ademais fixeron un lobiño de papiroflexia para rematar a experiencia!







 

CLUB DE LECTURA EN FAMILIA

O día 4 de xuño fixemos o club de lectura en familia ao que viñeron nenas e nenos de varios cursos acompañadas dalguén da súa familia. Foi unha bonita experiencia!

Ademais, a mesmísima Ledicia Costas enviounos un vídeo para agradecernos a lectura dun dos seus libros: Vampira de biblioteca, a historia dunha vampira que vivía nunha biblioteca e era vegana, non comía sangue, senón tinta!



















21 de mayo de 2024

CHAPAS PARA A FESTA DAS LETRAS GALEGAS!

Para festexar o noso día das Letras Galegas, deseñamos unhas chapas para levar o día da festa. Cada clase debuxou e pintou cadaquén a súa e despois escolleron a que máis lles gustou para facer a mesma para toda a clase!

Quedaron preciosas!




AGASALLOS DA ANPA!

Recibimos por parte da ANPA do cole estes xogos tan chulos para poder usar nos recunchos dos corredores da hora de patio de chuvia!

Moitas grazas! 






CLUB DE LECTURA 4º

Hoxe tivemos un club de lectura dun libro moi lido no noso cole: Escarlatina, a cociñeira defunta, de Ledicia Costas.

Un libro cheo de aventuras e receitas que nos encantan! Falaron das súas personaxes favoritas, da nosa escritora e esas anécdotas tan divertidas do libro.

Ademais tamén aparece unha figura moi especial para as nenas e nenos de 4º que viñeron: as avoas e os avós, que sempre están no noso corazón aínda que non sexa de maneira presencial.

E de outro tema que trae moita curiosidade, a morte e como se festexa noutros países.





24 de abril de 2024

MES DO LIBRO: LECTURAS COMPARTIDAS

Para festexar o día do libro, o día 23 fixemos a última actividade do mes do libro: lecturas compartidas.

Nela, as nenas e nenos máis maiores encargáronse de ler varios contos á rapazada máis pequena, compartindo así historias e aventuras nun día soleado do patio. Foi moi bonito e construtivo.

Para rematar o día, levaron a casa un pequeno agasallo: un libro viaxeiro para que teña outra vida e recorra máis mundos.

FELIZ DÍA DO LIBRO!

















19 de abril de 2024

MES DO LIBRO: CLUB DE LECTURA CON IRIA MISA

Hoxe tivemos a gran sorte de contar coa autora Iria Misa no noso club de lectura do libro Unha veciña de película. Ademais de falar do libro e da historia, as nenas e nenos que viñeron preguntaron moitas cousas interesantes acerca de libros, cine, familias diversas... Foi moi interesante e divertido falar con esta escritora! Aprendemos moitas curiosidades e datos. Nesta sesión houbo algunhas nenas e nenos que están pensando en escribir o seu propio libro, aínda lle pediron algún consello!

Despois asinounos os libros e os traballos tan chulos que tiñamos feitos nas nosas cámaras de papel!

Moitas grazas Iria! Estamos agardando a segunda parte xa!